Mae’r frân goesgoch yn un o rywogaethau brain mwyaf unigryw Iwerddon. Os gallwch fynd yn ddigon agos i weld ei choesau coch llachar a’i phig coch, fe sylwch fod y nodweddion hyn yn ei gwneud yn wahanol i’r holl frain eraill sydd i’w gweld yn nhirwedd Iwerddon. Hyd yn oed o bellter, mae gan frain coesgoch rai nodweddion defnyddiol sy'n ei gwneud hi’n hawdd eu hadnabod.

 

Eu crawcian uchel yw’r arwydd cyntaf yn aml fod brain coesgoch gerllaw. Gan nad ydyn nhw’n mudo, gellir clywed eu galwad yn canu o gwmpas wynebau clogwyni arfordirol a glaswelltiroedd amaethyddol arfordir gogledd, gorllewin a de Iwerddon drwy gydol y flwyddyn. Ceir brain coesgoch mewn niferoedd mawr ar draws de-orllewin Iwerddon, gyda’r siroedd Kerry a Cork ymhlith y mannau mwyaf poblogaidd ar gyfer brain coesgoch.

 

Mae penrhyn Iveragh yn gartref gwych i frain coesgoch am ddau reswm. Y cyntaf yw’r doreth o glogwyni arfordirol creigiog i frain coesgoch adeiladu eu nythod. Yr ail reswm yw’r system ffermio sy’n parhau mewn rhannau o’r penrhyn.

Mae’r gwartheg a’r defaid sy’n pori tirwedd arfordirol Iveragh yn cynnig cyfleoedd i frain coesgoch chwilio am greaduriaid di-asgwrn-cefn yn y pridd fel chwilod, morgrug, pryfed clustiog, a larfa gwyfynod a phryfed. Mae ffiniau caeau fel cloddiau glaswelltog, waliau cerrig a chloddiau pridd sy’n rhedeg ar dir amaethyddol Iveragh hefyd yn fannau gwych i frain coesgoch chwilota am fwyd, gan eu bod yn gartref i gynifer o hoff eitemau ysglyfaeth yr aderyn.