Bydd LIVE yn mynd ati i gyd-ddatblygu cynnyrch o ansawdd uchel ar gyfer twristiaeth gynaliadwy drwy ddefnyddio gwybodaeth newydd a gwybodaeth sydd ar gael yn barod am amgylchedd naturiol a diwylliant y ddau le. Bydd y wybodaeth yma’n cael ei gasglu gan bobl a phlant yn y cymunedau ar y cyd â staff y partneriaid sy’n gysylltiedig â’r project. Byddwn yn canolbwyntio ar themâu sydd o ddiddordeb i bobl leol ac ymwelwyr ac yn gofyn iddyn nhw ein helpu i adnabod y bylchau yn y wybodaeth sydd ar gael am yr amgylchedd ar hyn o bryd.

Mae’n bosib y bydd y gwaith gaiff ei gynhyrchu yn rhoi syniadau ar gyfer cynnig profiadau amgylcheddol a diwylliannol newydd neu well i dwristiaid a phobl leol; yn rhoi cyfle i ‘wyddonwyr y bobol’ rannu eu gwaith, yn adnabod gweithgareddau gwylio natur gwahanol a theithiau gwahanol yn canolbwyntio ar amrywiol agweddau sydd o ddiddordeb amgylcheddol. Caiff y rhain i gyd eu gweu at ei gilydd dan un brand a fydd yn rhoi hunaniaeth gref i bob rhanbarth. Byddant yn cael eu pecynnu i gyfres o adnoddau digidol a di-ddigidol deniadol, hawdd cael atyn nhw.

Mae LIVE wedi mabwysiadu’r model ‘Ecoamgueddfa’ o farchnata a hyrwyddo cydweithredol er mwyn creu ‘brand’ ar gyfer nodweddion naturiol y ddau le. Bydd y bartneriaeth hefyd yn trefnu gweithdai a rhaglenni ar gyfer ‘llysgenhadon’ (pobl sy’n ‘gwybod eu stwff’ am bopeth lleol). Y bwriad yw ysbrydoli pobl leol, pwy bynnag y bônt, i gredu fod y strategaeth marchnata digidol yn perthyn iddyn nhw a’i gwneud yn bosib iddyn nhw gael ddatblygu perthynas ddyfnach gyda’u hamgylchedd a'u diwylliant lleol – a chael budd economaidd o wneud hynny.